سُسرال میں کس طرح پردہ کرے؟

susral mein kis trah pardah kre

سُوال:سُسرال میں دَیْوَرو جَیٹھ وغیرہ سے کس طرح پردہ کيا جائے ؟ سارا دن پردہ ميں رَہنا بَہُت دُشوار ،گھر کے کام کاج کرتے وَقت کیسے اپنے چِہرہ کوچُھپائے؟

جواب: گھر ميں رَہتے ہوئے بھی بِالخصوص دَیْوَر وجَیٹھ وغیرہ کے مُعامَلہ ميں مُحتاط رَہنا ہوگا۔ صحیح بخاری میں حضرت سیّدُنا عُقْبہ بن عامِر رضی اللہ تعالیٰ عنہ سے مروی ہے، پیکرِ شرم وحیا، مکّی مَدَنی مصطَفٰے، محبوبِ خدا عَزَّوَجَلَّ و صلَّی اللہ تعالیٰ علیہ واٰلہٖ وسلَّم نے فرمايا ، عورَتوں کے پاس جانے سے بچو۔
ایک شخص نے عرض کی، یارسولَ اللہ عَزَّوَجَلَّ وصلَّی اللہ تعالیٰ علیہ واٰلہٖ وسلَّم د َیوَرکے مُتَعَلِّق کيا حکم ہے؟ فرمايا : دَیوَر موت ہے۔
(بخاری ج۳ص۴۷۲ حدیث ۵۲۳۲ )

دَیوَر کا اپنی بھابھی کے سامنے ہونا گويا موت کاسامنا ہے کہ يہاں فِتنہ کا اندیشہ زِيادہ ہے۔
مفتیئ اعظم پاکستا ن حضرتِ وقارِ مِلّت مولانا وقارُ الدّين عليہ رحمۃاللہ المبین فرماتے ہيں:
ان رشتہ داروں سے جو نامَحرم ہيں، چہرہ، ہتھیلی،گٹے ، قدم اورٹَخنوں کے علاوہ سِتْر( پردہ ) کرنا ضَروری ہے ،زينت بناؤ سنگھار بھی ان کے سامنے ظاہِر نہ کيا جائے ۔
(وقا ر الفتاوٰی ج۳ ص ۱۵۱)

منقول ہے:
جو شخص شہوت سے کسی اَجْنَبِيَّہ کے حُسن وجمال کو دیکھے گا قیامت کے دن اسکی آنکھوں ميں سیسہ پگھلا کر ڈالاجائے گا۔
( ھِدایہ، ج۴ ص۳۶۸ )
یقیناً بھابھی بھی اَجنَبِیّہ ہی ہے۔ جو دَیْوَر و جیٹھ اپنی بھابھی کو قصداً شہوت کے ساتھ دیکھتے رہے ہوں، بے تکلُّف بنے رہے ہوں ، مذاق مسخری کرتے رہے ہوں ،وہ اللہ عَزَّوَجَلَّ کے عذاب سے ڈر کر فوراً سے پیشتر سچّی توبہ کر لیں ۔
بھابھی اگر دَیْوَر کو چھوٹا بھائی اور جیٹھ کو بڑا بھائی کہدے اِس سے بے پردَگی اور بے تکلُّفی جائز نہیں ہو جاتی بلکہ یہ اندازِ گفتگو بھی فاصِلے دُورکر کے قریب لاتا ہے اور دَیْوَرو بھابھی بد نِگاہی ،بے تکلُّفی،ہنسی مذاق وغیرہ گناہوں کے دَلدَل میں مزید دھنستے چلے جاتے ہیں۔حالانکہ جَیٹھ اوردَیوَر وبھابھی کا آپس میں گفتگو کرنا بھی مُسلسل خطرہ کی گھنٹی بجاتا رہتا ہے !

؎ اللہ عَزَّوَجَلَّ کرے دل میں اُتر جائے مری بات

دَیْوَر وجَیٹھ اور بھابھی وغیرہ خبردار رہیں کہ حدیث شریف ميں ارشاد ہوا ، اَلْعَينانِ تَزْنِیَان یعنی آنکھيں زِنا کرتی ہيں ۔
(مُسنَد اِمام احمد ج۳ ص ۳۰۵حدیث ۸۸۵۲ )
بَہَرحال اگر ایک گھر ميں رَہتے ہوئے عورت کیلئے قریبی نامَحرم رشتہ داروں سے پردہ دشوارہو تو چہرہ کھولنے کی تو اجازت ہے مگر کپڑے ہرگز ایسے باریک نہ ہوں جن سے بدن یا سر کے بال وغیرہ چمکیں ياایسے چُست نہ ہوں کہ بدن کے اعضاء جسم کی ہَیْئَت(یعنی صورت و گولائی)اور سینے کا اُبھار وغیرہ ظاہِر ہو ۔